Persones
Persons

Ulon te cunté de chësta persona che ie n lën, che ie n lech, che n sas, che ies tu y che son ie. De chësta persona che ie n star y che ie jëuna ajache i autri ie vedli; che rejona la rujeneda di minerai, che cianta la cianties di ruves y che bredla al stlaië dla di ajache n ie nce cians. Nëus ulon te cunté de si sëmies, de si duel y de si dejideresc. De si corp, si man che dà y che tol, si uedli che aud y dla lënga che dessënia; coche la ravises va y l pëil viagia.

Ulon te cunté de Persons Persone Personen, dla Biennale Gherdëina ∞.

Chiran l dialogh cun la valedes dl’Elpes, i crëps y i ciei dla Ladinia, tla Dolomites y fajan festa cun la gran varietà de manieres de viver – dla persones umanes, di tieres, dla plantes, di minerai y di fonc – che n anconta tlo. La stories de Persons Persone Personen vën cuntedes te manieres defrëntes. Tres mostres, ancuntedes, performances, cianties, stories cuntedes, mbracedes, libri y d’autri mesuns per se giamië ora ideies.

Cun la curadëures Lucia Pietroiusti y Filipa Ramos, se muev Persons Persone Personen sun doi scines:

Sun una che tën cont dl vester dla persona te si raion, ncertleda ite tl mond di tieres y dla plantes, legalmënter o autramënter, se damandan coche l’ert possa recunëscer i dërc dla Tiera y tò demez la spartizions.

L’autra à da nfé cun la vedla memories y chëles che à mo da unì sun l troi cun la persones, i tieres y la plantes y che tën cont di sistems de migrazion, di mudamënc per gauja dla sajons, dl desmunté, te chël post y ti raions ntëur via. Coche dut se forma y se fej su l un cun l auter te n prozes che va inant tresora y che se nfluenzea y se valivea ora.